Vargje ditore

”Elegji për Kosovën” – Mihal Hanxhari

Zot nëse njerëzit s’dinë të shohin sot
Dhe nesër askush s’do ketë sy
Shpëto o Zot vetëm sytë e fëmijëve të Kosovës
Zot shpëto ata sy tē kaltër të peshqve blu
Që flenë në shi dhe ëndërrojnë engjëjt tu

Zot nëse zërat e çmendur s’do pushojnë
Dhe tamtamet do përplasen në kupēn e qiellit
Dhe klithmat e marra do qeshin e do thërrasin
Zot shpëto ato heshtje të pleqve të Kosovës
Që flasin me brazdat e baltës plot ujë të vjetër
Ujë nga shiu i parë i botës që njomi këtë dhe

Zot nëse s’do ketë më vend në botë ku të lindin nënat
Oh lëre o Zot atë rrugë të gjatë ku nuset e Kosovës
Po lindin yjet e Yllnajës së Mjelmës
O Zot ato janë foshnjat e tua

Dhe në s’do ketë shenjë nga delyzhi ku pirgu do bëhet
Gropë dhe gropa kodër, mbill nëpër rrugët e Kosovës
Dyqind qiparisa dy mijë qiparisa dyqindmijë qiparisa
Dhe dy milionë rrape o Zot
Dhe ai do jetë pylli i parë i Lirisë në botë

Tiranë, prill 1999

Mihal Hanxhari/GazetaLetrare.com