Vargje ditore

”Piktori” – Poezi nga Shkëzen Halimi

T’i kam vizatuar krahët
që të fluturosh mbi majën më të lartë
t’i kam vizatuar duart
që ta ledhatosh kujtimin
dhe buzët plot zjarr
që ta zgjosh nga gjumi
kafshën e fjetur që të mban në ankth

T’i kam vizatuar këmbët
që të vraposh pas agimeve polare
deri në fund të botës
ta kam vizatuar mollën e ndaluar
që të mos biesh në humnerën e mëkatit

Edhe çelësin e jetës ta kam vizatuar
që ta hapësh derën e odës sime
dhe të ulesh pranë meje
për ta pikturuar portretin tënd ta pamundur
sepse më mungojnë ngjyrat
e ëndrrës më të bukur

Shkëlzen Halimi /GazetaLetrare.com